Nagbigay na ng pahayag ang lalaking nagpakilalang security guard na sangkot sa viral na insidente sa pagitan niya at ng isang Sampaguita vendor.
Sa isang video, makikita ang guwardiya na nakasuot ng kanyang security uniform at cap, ipinaliwanag ang kanyang panig sa nangyari. Ayon sa kanya, hindi naging kooperatibo ang vendor bago pa man nagsimula ang pag-record ng video. Aniya, “Sinusunod ko lang po ‘yung trabaho ko bilang isang security guard.”
Tinalakay din ng guwardiya ang kanyang mensahe sa pamilya ng vendor, sinasabing responsableng magulang ang hindi papayag na magtinda ang kanilang anak sa lansangan at magkunwaring estudyante. “Kung magulang po kayo sana ay nagpaka-magulang po kayo, hindi niyo sana pinapayagan ‘yung anak niyo na nagtitinda kung saan-saan,” ani pa niya.
Nilinaw rin ng guwardiya na wala siyang intensyon na saktan ang vendor. “Nakulitan na po ako sa kanya, bilang pagsunod ko sa trabaho ko, bilang pagsunod ko sa nakakataas sakin sinaway ko ‘yung bata pero ayaw pong magpasaway. Hindi ko po talaga ginusto ‘yung nangyari,” paliwanag niya.
Ikinuwento rin niya ang naging pagtanggi ng vendor na umalis kahit ilang beses niya itong pinaalalahanan. “Ilang beses ko ng sinabi na umalis, pero ayaw niyang umalis. Tapos nong paghugot ko ng Sampaguita, nasira, tapos pinaghahampas na ako sa mukha. Sino pong matutuwa sa ganon?” dagdag pa niya.
Binigyang-diin niya na ang kanyang mga aksyon ay ayon lamang sa kanyang tungkulin bilang security guard. “Kami bilang security, sumusunod lang po kami sa utos kasi ‘yun po ang trabaho namin, doon po kami sumusweldo,” aniya.
0 Comments